الحلقة السادسة من برنامج ضيف المربوعة مع معا ضيفنا المميز اسامة الجلي

Ahmad Elhouny

نظرا للضروف التقنيه نبوكم اتوسعوا بالكم لنا واتسامحونا على التاخير _ ضيفنا اليوم هو اسامه جلي
مرحبا اسامه

Osama Elgelly مرحبا خوي احمد شنو حالك

عاصم عامر سلام عليكم

Osama Elgelly و عليكم السلام و رحمة الله و بركاته

Ahmad Elhouny عرفنا بيك اكثر ( البطاقه الشخصيه )

Osama Elgelly اسامة مفتاح الجلي

Osama Elgelly مواليد بنغازي 81

Osama Elgelly خريج كلية الهندسة قاريونس هندسة كهربائية

Osama Elgelly توا قاعد في امريكا نقرا في ماجستير كان ربي وفق

عاصم عامر مشاء الله ربي يوفقك ويجعلك ذخر لليبيا

Osama Elgelly ان شاء الله بارك الله فيك

Ahmad Elhouny احكيلنا كيف تعرفت على القروب وشنو اكثر شي عجبك فيه وخوض راحتك في الدوه

Osama Elgelly و الله تعرفت عالقروب عن طريق خالد الترهوني بارك الله فيه

Osama Elgelly اكثر شي عجبني في القروب هو الاعضاء و المحتوى متاع القروب يللي كانن و مازالن اكثر من رائعة

Osama Elgelly بصدق القروب هذا يعنيلي الكثير لاني كلما نرايف عليالبلاد نخش و نلقى الشباب و الشابات دايرين جو فا بجديات يغيرلي في جوي

Osama Elgelly و الاعضاء بارك الله فيهم امكبدين عالقروب و يحاولو يخلوه في مستواه المعهود بقدر المستطاع

Osama Elgelly الكلمة عندك خوي احمد

Zyad M Al Kadiki مساءك سعيد خويا اسامة

Zyad M Al Kadiki نورت المربوعه

Osama Elgelly مرحبتين خوي زياد كيف حالك و حال صغارك

Zyad M Al Kadiki الحمد الله .. بس حبيت نسالك عالغربة و شنو اكثر حاجة مرايف عليها هنا؟

Osama Elgelly و الله يا خوي زياد قولي شنوالحاجة يللي مش مرايف عليها اسهل تهايالي

Osama Elgelly و الله انا اكثر شي مرايف عليه لمة العيلة و السهاري و انا هنا احداث واجد صارن غادي و انا قاعد هنا و كأني في حلم

Zyad M Al Kadiki ربي يسهللك ان شاء الله ... هواياتك و اهتماماتك في ليبيا و هل تغيرت بعد امريكا؟

Osama Elgelly و الله الهواية الاساسية هي كرة القدم و يللي هي هواية الليبيين كلهم,,,, و لا بالعكس تهايالي نلعب في كورة هنا اكثر من ليبيا

Ahmad Elhouny الحمد لله اهو المدير جي كمل باقي القاء مشكور لان النت قاص و اخوك على النقال

Osama Elgelly و الحاجة الاخرى و مش عارف تعتبر هواية و الا لا انا ديما نحب نتلاقا مع الاصحاب و نطلعو لاي مكان نهدرزو و الا نتعشو و حتى هيا ما انقطعتش عليا هنا

Zyad M Al Kadiki تمام .. وربي يوفقك .. الحالة الاجتماعية مش مذكورة في بطاقتك؟

Osama Elgelly لكن غير زايد بلادك هيابلادك مهما حاولت انك تستمتع بوقتك هنا فيه حاجة ناقصة

Osama Elgelly هههههههه لا مازلت اعزب

Zyad M Al Kadiki حلم اسامة الجلي؟

Osama Elgelly ان شاء الله ربي يوفق و نلقو بنت الحلال

Osama Elgelly و الله واحد من الاحلام ما صارش منه كنتانتمنى اني نكمل دراستي و نروح لوالدي بالشهادة لكن للاسف توفاه المولى قبل لا يتحقق

Zyad M Al Kadiki الله يرحمه و يرحم موتى المسلمين

Osama Elgelly و الحلم الاساسي هو انني عندما اقف بين يدي الله سبحانه و تعالى يقوللي اذهب اني غفرت لك

Osama Elgelly امين يا رب العالمين

Zyad M Al Kadiki امين يارب العالمين ... لو حلمك الاول تحقق و تحصلت عالشهادة .. تحب تكمل غادي او تروح تكمل هنا .. خصوصا لو جاتك فرصة للعمل في امريكا؟

Osama Elgelly بصدق و بدون مجاملات
يعلم الله اني بنروح لبلادي بمجرد الحصول عليالشهادة
و عارف السؤال هذا ديما ينسئل من الامريكان و الاجابة دائما هي الرجوع للبلاد

Osama Elgelly و الله كان كل واحد فكر بانانية في نفسه من يبي يطورله بلاده
و بعدين انا قروني دكاترة ليبيين ليش نحرمو في عيالنا منها

Zyad M Al Kadiki بارك الله فيك و في اصلك .... ممكن تقولنا عيوب اسامة الجلي و بكل صراحة؟

Osama Elgelly و الله مش عارف بس نحس في روحي صريح اكثر من اللزوم مرات نحس في كلامي فيه جرح شويا مع انني ما نقصدش الجرح
فا مش عارف

9 hours ago ·

Zyad M Al Kadiki سؤال اعتبرة من خالد الترهوني ... أكثر موقف أثر في حياتك وغيرها كليا؟

Osama Elgelly زمان درت حادث و كنت مولع براين ادمز فا بعد الحادث تخيلت روحي مت علي هذا فالحمد لله سيبت السماع للاغاني
مع اني توا مرة مرة نسمع فيهن

Zyad M Al Kadiki سؤال متحبش حد يساله لاسامة الجلي؟

Osama Elgelly و الله شنو بنقولك ما يحضرنيش سؤالمعين
لكن في الاغلب يكون انه واحد يسألني علي خصوصيات حد اخر
يقتل فيا النوع هذا من الاسئلة

Zyad M Al Kadiki بما انك من ممارسي كرة القدم .. غير المنتخب الوطني .. من يشجع اسامة؟

Osama Elgelly فيه سؤال ديما يسألو فيه ليا هو "امتى مروح" ما نحبش مش لاني ما نبيش نقول لكن المشكلة اني انا بروحي مش عارف فالسائل عادة يسحابني ما نبيش نقول

Osama Elgelly و الله انا ما عنديش حد معين نشجع فيه لكن نحب انتفرج عالبرازيل و زيدان

Zyad M Al Kadiki سؤال من هيثم الشريف .. شن جو الغربة تعبتو في الاول و لا كيف مشن الامور؟

Osama Elgelly يعني ما يهمنيش كانالبرازيل فازو اوخسرولكن نحب نتفرج علي كورتهم

Osama Elgelly و الله بارك الله في الشباب يللي قبلنا وفرولنا كل شيء ممكن نستحقوله من استقبال فيالمطار و التسكين و التوصيل للمعهد و الاسواق فا من الناحية هذه الحمد لله ما تعبنش
لكن من ناحية تسييبت البلاد و الاهل تحسها فيها جو ما حد يقدر يساعدك فيه

Osama Elgelly لكن مع الوقت و كثرة المكالمات تتاقلم مع الجو

Zyad M Al Kadiki الحمد الله عالشباب مازال فيهم الخير و مش غريبة عالليبيين

Osama Elgelly بارك الله فيهم و ان شاء الله ربي يقدرنا علي خدمة يللي جايين جدد

Osama Elgelly ديما نقول فيها للجدد ما اتحشموش مننا راهو كلنا كنا جدد و لقينا ناس قدامنا

Osama Elgelly معليش ما نتذكرش كان تذكرني

Zizi Rustomakis وين اندزو اسألتنه..

Zyad M Al Kadiki لو اسامة عطوه فرصة لتغيير شئ واحد في بنغازي ماذا سيكون هذا الشيء؟

Zyad M Al Kadiki اكتبي السؤال هنا اخت زيزي

Osama Elgelly انا عجبني ردك
لاكن الشيء يللي نحب نغيره هو عقليه بعض الناس يللي تقول هي خاربة خاربة يعني بتوقف عليا انا
فا نحس في العقليات هذي هو جزء كبير من يللي خلى بنغازي و ليبيا بالشكل يللي هي عليه توا

Mani Ali السلام عليكم
خير عليكم جميعا ومرحبا بزياد وخونا اسامه معيش يازياد نبو انوجهو سوال وين نسالو

Zyad M Al Kadiki هضوم نعتبرهم مش من اهل بنغازي و مش من ناسها خوي اسامة .. لذلك هم برة الحسابات و مالهمش علاقة بالسؤال

Osama Elgelly لكن عايشين في بنغازي و مخربينها

Osama Elgelly لولاهم راهو بلادنا انظف و احسن و هذا شيء ما يخفش علي حد
وبصدق نحن نتمنو لبنغازي افضل من هكي

Zyad M Al Kadiki ماني تقدر تسال

Osama Elgelly و بعدين فيه حاجة اخرى نحب نغيرها و هي وضعيةالشباب مع التعاطي الفتة الاخيرة قعدت بشكل منتشر و علني

Osama Elgelly الفترة*

Zyad M Al Kadiki شنو رايك في وجود العنصر النسائي في المجموعه
و تاثيرة على نجاح المجموعه

Mani Ali امنور يازياد بارك الله فيك
اكثر اكله اتحبها

Zyad M Al Kadiki شكلك جعان يا ماني هههههههههه

Ahmad Elhouny بحكم تواجدك بالخارج _ ماهي نظره الاجانب لليبيا كا ناس

Osama Elgelly لا العنصر النسائي في المجموعة قائم بواجبه و زيادة و اانا نحييه
مع انني نعتبر مش من مشجعي الاختلاط لان اخواتنا في القروب بارك الله فيهن يشاركن بكل ادب و احترام و انا بجديات نعتبر فيهن اخواتي اللاتي لم تلدهن امي

Osama Elgelly اكثر اكلة نحبها العصبان و الرز عالمرق متاعه

Zyad M Al Kadiki سؤال من ماني عن اكثر اكلة تحبها؟

Ali Alkowafy السلام عليكم كيف حالكم
يا اسامة كم لك سنة قاعد فى امريكا

Osama Elgelly و الله يا احمد في المدة القريبة الماضية ما كانوش يعرفونا لكن بعد تعرفو علينا بارك الله في الشباب واخذين فكرة غير عادية علي الليبيين انهم جديين و ملتزمين بدينهم و بمعاملتهم فالحمد لله الشباب بارك الله فيهم قدرو يعكسو صورة كويسة علي ليبيا

محمد البرعصى السلام عليكم .................. أسامه سامحنى واجد وحقك عليا وشكلها الرساله الى دزيتها لكى ما وصلتش

Osama Elgelly و عليكم السلام و رحمة اللهو بركاته اعليوة كيف حالك
انا ليا توا 3 سنوات و شهرين

Osama Elgelly لا عادي و لا يهمك يا احميدة الشباب بارك الله فيهم كفو و وفو

Osama Elgelly معليش تصحيح للرد يللي فوق "مع انني نعتبر مش من مشجعي الاختلاط الا ان اخواتنا في القروب بارك الله فيهن يشاركن بكل ادب و احترام و انا بجديات نعتبر فيهن اخواتي اللاتي لم تلدهن امي

محمد البرعصى مداخله ................. كيف يتم ارسال الارسله يا مدير ؟؟؟

Ahmad Elhouny اكثر الجاليات العربيه انسجام مع الجاليه الليبيه

Osama Elgelly السعودية

Osama Elgelly عارف سبحان الله فيه انسجام بينا و بينهم غير عادي

محمد البرعصى سؤالى .............. بما انك توا فى اقوى دولة اقتصادية وسياسية فى العالم ...... شنو الفرق الى لحضته بينا وبينهم .... وليش الليبيت متأخرين عليهم مئات السنين ؟؟؟؟ مشكور ومره اخرى سامحنى

Mani Ali اطرف موقف واجهتا اول وماوصلت غادي

Osama Elgelly و الله اكثر شي لفت نظري هوالنظام و احترام البني ادم و اعطاء العمل حقه و لمن يستحقه

Osama Elgelly معاملة الناس في الشارع تقول هم يللي مسلمين مش نحن بالابتسامة و مساعدة المحتاج

Osama Elgelly راحت مني شنطتي في الترنزيتو ما نعرفش نتكلم انجليزيفا قعدت نحاول نتكلم بالاشارات مع بعض الكلمات يللي عارفها لكن ما صار شي
قلت فوتها و خلاص بعد جيت نختم في كرت الصعود لقيت الموضفة لبنانية قريب اضبطتها و حكيتلها عالقصة كلها

محمد البرعصى ههههههههههههههههههههههههههههههههه تمام وجاتك الشنطه ؟؟

Osama Elgelly جتني في الحوش بعد وصلت

Mani Ali هههههههههههه باهي توا اكيد جو تمام خخخخ

Osama Elgelly عطيتهم عنوان واحد من الشباب يللي قبلنا جابوها له في الحوش

Osama Elgelly لا الحمد لله فرق بين السماء و الوطا

محمد البرعصى أسامه انقولك طرفه صارت موسم الحج الى فاتت ...انه جماعتنا تلخبطو فى الشناطى ..... وقعدت هردميسه فى المطار يلا .............. ان شاء الله الشباب الى طلعو للخارج وايطورو البلاد على الاقل خطوتين للأمام بدل التراجع

Osama Elgelly عارف لما روحت زيارة حسيت المطارات مشنفسهن يللي جيت منهن شكلي كنت منفجع و مش فاطن لروحي

Osama Elgelly و الله ان شاء الله ربي يقدرنا فيه حاجات واجدة ساهل تغييرها يا احميدة لكن تبي نية طيبة بس

محمد البرعصى أسامه فريقك المفضل فى الدورى الليبى ؟؟؟

Osama Elgelly و الله انا مش من النوعية متاع انشجع نادي لكن نحب نتفرج عالاهلي بنغازي

محمد البرعصى منور يا أسامه ................

Osama Elgelly لا الحق ينقال

محمد البرعصى طموحات أسامه المستقبليه ؟؟؟

Osama Elgelly اني نكمل الدكتوراة و نحاول نغير اي شي في البلاد للافضل طبعا

محمد البرعصى ان شاء الله اميييييييييييييييييييييييييييييييييييييييييييين

محمد البرعصى أسامه قبل مانختمو معاك ؟؟؟؟كلمه أخيره لكل أعضاء القروب

Osama Elgelly لاني لاحظت حاجة انه الانسانالليبي ما ينقصه شي بيش يتفوق و الدليل علي هذا انه الطلبةالليبيين يللي جو هنا هم من افضل الطلبة في الكورسات يللي ياخذوهن

Osama Elgelly و الله نحب نقوللهم بارك الله فيكم شباب و بنات علي الاستضافة يللي تعنيلي الكثير و بارك الله فيكم علي حبكم للقروب و ممكن ان القروب الفترة الماضية صار له شوية لكن بوجودكم ان شاء الله يرد زي قبل و احسن

Osama Elgelly و ان شاء الله كنت ضيف خفيف عليكم

Mani Ali اسامه شنو الطقس في ولاية اللي انت فيها

محمد البرعصى مشكور ياأسامه وبصدق انت من شباب القروب المميزين والى ليا الشرف انى تعرفت عليك من خلال ها القروب .....كنت من احد الركائز الرئيسيه الى ساهمت فى رقى القروب ............. انتمنالك كل الخير والتوفيق فى الحياه العلميه والعمليه ......... وبصدق متأسف واجد ودزيلتك رساله لكن الباين ما وصلتش .... لكن بارك الله فيك على رحابت صدرك وبارك الله فى الشباب الحلوين امتاع القروب

Osama Elgelly و الله متقلب بشكل ما تصورش حتى ندهم مثل يقولو فيه " كان الجو مش عاجبك في كولورادو انتظر 10 دقايق" لكن يعتبر صقع الايام يللي فاتن وصلت درجة الحرارة ل -25 درجة مئوية

Osama Elgelly ‎*عندهم

محمد البرعصى منورين يا شباب احمد الهونى ومانى وعليوه وباقى الشباب

Osama Elgelly بارك الله فيكم جميعا و في المدير زياد و نشوفوكم علي خير ان شاء الله و ما تنسونش من خالص الدعاء

محمد البرعصى منور يا أسامه وبصدق أبدعت اليوم

Osama Elgelly بارك الله فيكم و نحب نشكركم جزيل الشكر لاختياري لاكون ضيف المربوعة بعد نخبة من كبار المجموعة و هذا بجد شرف كبير ليا

Ahmad Elhouny طبعا نتاسف على الجو الي صارلي ونشكر المدير الي انقذ الموقف و منور يا حمادي و يا اسامه

Osama Elgelly بوجودك خوي احمد بارك الله فيك ما قصرتش

Mani Ali امنور يااسامه وان شاء الله بالتوفيق
وحميدى البرعصي امنور

Osama Elgelly بوجودك يا ماني اجمعين ان شاء الله

محمد البرعصى منور يا مانى وبصدق اليوم أسامه اتحفنا وكان ضيف مميز وغيرلنا جو القروب شويه

Mani Ali بوجودكم واسامه هو نجمنا اليوم يامحمد

Ahmad Elhouny خطرها يا اسامه امتى اخر مره مشيت لهون

Osama Elgelly في صيف ال2009 بعد جيت زيارة

Osama Elgelly انا طبعا قعدت معيد في هون لمدة سنتين قبل ما نجي هنا

Ahmad Elhouny شنو تحمل من ذكريات من بلاد التمر و الاقبي

Osama Elgelly طبعا اللهجة الشرقاوية دارتلي مواقف مرة واحد من الطلبة قلتله تره عطيني بنينة استك مسكين و مدلي ادواته كلهن متاع انت خوذ البنينة ما عرفهش شنو مسكين هههههه

Ahmad Elhouny ههههههه

7 hours ago ·