محمد البرعصى السلام عليكم ورحمة الله وبركاته ............. نبدو حلقتنا اليوم مع شخصيه مميزه وهوا من مؤسسى القروب ....... بدون مقدمات ... نبدو حلقتنا معا ضيفنا المميز خالد الرقيعى ..( ملاحضة اعتذار المحاور المفروض الى ايكون امعاكم اليوم .. وان شاء الله المانع خير .. والأسئله ترسل للخفاش خالد الترهونى ) علم ............ز مرحبا خلود
- خالد الرقيعي السلام عليكم ورحمة الله وبركاته .. مساءالخير للجميع
وكل سنه وانتوا طيبين - محمد البرعصى مرحبا خلود ....... خالد الرقيعى ياريت اتعرفنا بشخصيتك وتقولنا سيرتك الذاتيه ؟؟
- خالد الرقيعيشكرا احميده وهيثم
الاسم خالدعلي الرقيعي
العمر 37 سنه
العمل موظف في جامعة قاريونس
المؤهل بكالوريس اقتصاد - محمد البرعصى ماشاء الله ربى ايزيدك طولة العمر ............. ياخالد ياريت اتحدثنا على طفولتك اشويه وين ترعرعت واين مدرسه قريت ؟؟؟؟
- خالد الرقيعي والله طفولتي كانت حلوه انا مواليد سيدي حسين ترعرعت فيه وكان ليا فيه ذكريات حلوه وجميله .. دراستي الابتدائيه كانت في مدرسة اسماء والاعدادي كان في مدرسة جمال عبدالناصر والثانوي كان في مدرسة شهداءيناير
- محمد البرعصى شنو اهتمامات خالد الرقيعى بعد العمل ؟؟؟؟؟؟
- محمد البرعصى باهى تمام معناها نسقولنا فى مباراة قريب ........ كيف كانت بدايتك فى الفيس وفى قروب المصطلحات الليبيه ؟؟؟؟
- خالد الرقيعي علي حسابك نسق وانا معاك
بدايتي كانت عن طريق صديق اسمه (مجدي الشلماني) سكن في راسي قريب اسبوع واقنعني لعند درت حساب .. بالنسبه للقروب قاللي عليه الكابو - محمد البرعصى هههههههههههههههه مايهمك شى ............. نبدو فى اسئلة الشباب وما شاء الله امنورين وايراجو فيك من امبدرى
- محمد البرعصى نبدو بسؤال من الغزال اقدوره (متألق كالعاده وطاولته حصل عليها تخصيص ) منور يا اقدوره سؤاله ايقول /:
ماذا تعنى لك الوالدة الطيبة بعيدا عن كونها ابلتك فى الابتدائى؟ - خالد الرقيعي والله يااقدوره امي شن انقولك عليها .. هي حبيبتي وعشيقتي وبلادي ودنيتي كلها .. هي ديما امصبيه معاي وتوا مانحكيلكش ساكنه عالزيزه
ربي يعطيها طولة العمر وامهاتكم ان شاءالله - محمد البرعصىلا حقاتها تسكنلك ....... تبى تفرح بيك .... خلاص امتى الفرح ... قصدى امتى العشاء ( خخخخخخ على اساس اس صبايا) ......
سؤال من هيثم الشريف (هذا من الصبح ايراجى فيك ..منور ياهيثم وشنو جو الخط امعاك توا ...........
س من ايشجع في الكوورة الليبي...ة والاوروبيةوالمنتخبات؟؟ - خالد الرقيعي ان شاءالله يارب .. وحيكون القروب كله معزوم
انا انشجع محليا النصر
والاوربيه ريال مدريد والميلان ومانشستر
والمنتخبات الارجنتين - محمد البرعصىالله غالب اتحملوك وخلاص ضيفنا اليوم .( القروب كله أهلاوى ههههههه) سؤال الجاى فى محله ومن بركة القروب محمد الرايس ( رغم ضروفه لكن اصر انه ايشوف ضيف الليله ويسأله .................
س هل الاقتصاد اختيار شخصي ام توجيهي وما هي نصائحك لنا في مجا...ل الاقتصاد لنستفيد به في حياتنا الشخصيه؟؟ - خالد الرقيعيالاهلاويه خوتنا وانا مش متعصب راه (اشاعه)
لا يااحميده كانت رغبتي الطب لكن ماسخرش ربي
بالنسبه للاقتصاد يااحميده سؤال صعب
مره دكتور عراقي دوا عالاقتصاد الليبي قالنا ضروري من الانفتاح وضروري يقعد الافراد في يدهم حريه الاستراد والتصدير .. مش في ...يد الدوله بس
عموما توا انقولوا يمشي الحال - محمد البرعصى وان شاء الله على ايدكم ايتطور اقتصادنا وانتقدمو بليبيا للأمام ....... نواصل الأسئله ... سؤال غريب ( ياربى عادى عرب بيروت طالقين فيهم ) سؤال من أسماء شلوف....... س لو ربحت جائزه 500000 دولار شن اول حاجه تفكر تديرها ؟؟ ومن اول واحد تتصل بيه عشان تخبره ؟ بالنسبه ليا اندور شنطتى وانحل بكل تشاو عل الكاكاو
- خالد الرقيعي والله يا اسماء اول حاجه انحجج الوالد والوالده
واول واحد انكلمه هي أمي - محمد البرعصى ربى ايطول فى عمرها واتحج انت وايها ....... سؤال من الخفاش خالد الترهونى ( بطل سكنان يا خالد اهو حطيناه سؤالك) س -ماذا يعني لك الشاب الخلوق صاحب الابتسامه الهادئه محمد الرقيعي رحمه الله ..
- خالد الرقيعي شن نبي نحكي ياخلوده ... كان صاحبي اكثر من خويا
كان حنون بكل وكان يعطي من غير ما يرجي السؤال
انحس روحي توا ان فقدت قلبي والله كانت صدمه قويه بالنسبه
الله يرحمه ويغفرله ويرحمه - محمد البرعصى اللهم اغفر له وارحمه ... واجعل مثواه الجنه .. امين
- محمد البرعصى سؤال ..منى (المحاور مافيهاش امتى مايبى يسأل يسأل ) ..... شنو أفضل أكله اتحبها ؟؟ وأفضل لون وعليش ؟
- خالد الرقيعي افضل اكله هي المكرونه لمبوخه ولبراك .. نتعب بعد انشوفهن
افضل لون انحبه السماوي ايخطر عليا في البحر اللي انحبه واجد - محمد البرعصى سؤال ثاني من قدوره (حقاته اليوم جاى بدرى ماسك الطابور ) ماذا يعني لك قروب سيدي حسين ..........
س - خالد الرقيعي قروب سيدي حسين قروب الشيطنه واللعب والمنابشه
قضيت اجمل فترات حياتي معاهم .. تعرف يااقدوره ضروري انخطم عليه كل يوم كنت شيطان وانا صغير وعملي اسود .. لكن كانت شطانتنا بريئه ( مش كلها) - محمد البرعصى خخخخخخخخخخ شطانتنا برئيه (حتى انا كنت شيطان برئ هههههههههههه) سؤال من هيثم فيه شوية زر ............ مش شورى بكل
س -- لماذا لم يتجوز لغايه الان .. هل لانه فايت الموضوع والا الظروف اللي يعاني منها اغلب الشباب ؟؟ - خالد الرقيعي والله يا هيثم الزواج قسمه ونصيب .. هن الضروف بالدرجه الاولي
يعني واحد عايش علي راتب تبيلا بيش يزوج ويكون نفسه في هالظروف اللي اتشوف فيها .. لكن انقولوا خلاص هانت - محمد البرعصى ربى ايوفقك وايعينك على هل المحنه .......... سؤال من أسماء ( عرب بيروت مازالو واعيين كرمال ها الشوارب ) ...........
س _ امتي كان اخر مره ضحكت من قلبك ؟ وشن كان الموقف اللي ضحكك ؟؟ - خالد الرقيعي والله يااسماء شن انقولك .. من كم يوم كنت في محل خذيت حاجتي وطلعت وركبت في سيارتي ألقيت وليه راكبه جنبي تلخبطت ومعش فهمت والوليه تمت اتعيط ياسعدددددددددددد واتعيط .. تاريتني متلخبط في سيارتي وركبت في السياره اللي امدرسه قدامي وجا سعد وقعدت انفهم فيه والضحكه ماسكتني ماقدرتش انوقفها وجاب الله انه كان شاب متدين وفهم الموضوع وباهي اللي عدت علي خير
- محمد البرعصى هههههههههههههههههههه افطن جاتك فى الريش ...... وين يا خلود مازلت اصغير ...(سؤال من الكابو ... تأخير لكن مدير ما فيهاش )
س -- احكيلنا علي قصه 21 31 علي روحك يا خالد ؟؟ - خالد الرقيعيههههههههههههههههههههه لا تفضحنا هكي
زمان خالي الله يرحمه بات الكابو كان عند بيجو GL وكان الكابو يسرق فيها
فنركبوا معاها وانديروا في روحنا حكومه وكان ولد خالتي فؤاد ديما هو الرئيس ويمسك في حاجه كأنها جهاز لاسلكي ومايقولش الا في 2131 مش عارف ...شن قصده بيها لكن كانت اتخوف في التشاديه واجددددددددددددددددد See More - محمد البرعصى هههههههههههه خخخخخخخخخخخخخ 2131
- خالد الرقيعي ههههههههههههه مش قتلك طفوله بريئه
- محمد البرعصى سؤال من هشام البركي (مرحبا هشام )س -- كم زردت مرة فى حياتك ؟؟
س -- وشنو الهواية اللى كنت تمارس فيها ؟ - خالد الرقيعي هههههههههههههههههههههه انا وهشام اكثر وحدين ازردوا في العالم والله تعرف رقم خيالي .. وبالنسبه للهوايه تو انقولها لك ابروحك
ههههههههههههههههههههههههه - محمد البرعصى ربى ايخليك لبعضكم ........ هيجو شنو وراكم
سؤال من احمد الهوني ( سامحنا واااااااااااااااااااجد عل التأخير )ماهي الصوره الي تراها لنفسك بعد 10 سنوات
س _ - خالد الرقيعي والله يااحمد اول حاجه يعطينا الله طولة العمر
انشوف في روحي ان شاءالله احسن من توا
انا بطبعي متفائل وديما انقول ان بكره حيكون احسن من اليوم - محمد البرعصى سؤال اخر من مانى (طولنا عليك يامانى )
س - بمناسبة رمضان شنوجوك مع رمضان يعني الحالة العصبية وكل عام وانتم بخير - خالد الرقيعي كل عام وانت بألف خير
ياماني انا ناخذ في اجازه من العمل في رمضان لان عملي مع الطلبه والطلبه توا واعرين في التعامل وانا عصبي شويه وحشاش درجه اولي
فنجيب فيها من الاخير وناخذ في اجازه - محمد البرعصى صار نوم فى رمضان ..... ربى ايعينك خخخخخخخخخخ
س - استاذ خالد بما انك من سيدي حسين سحساوي ) ياريت تعطينا ولو نبذه مختصره عن هذا الحي وعن بعذ الوجوه المضيئه التي خرجت من هذا الحي لتنير سماء المدينه ؟؟ سؤال من الرايس - خالد الرقيعيهو حي في وسط مدينة بنغازي حيث يربط شمالها بجنوبها عبر شارع عبد الناصر وشارع ' الكاروات ' في شرقه وفي وسطه شارع ' الشين ' بين السوق القبلي في الجنوب والدردوحه في الشمال لحد السكابلي ومن طلعت العديد من الشخصيات منهم عبدالقادر البدري رئيس الو...زراء في العهدالملكي والعلام سفير ليبيا في المغرب وا.عبدالمولي دغمان عميد كليةالاداب سابقا والشيخ سالم زوبي خطيب الجامع وامامه وكان شخصيه ذات علم وفكر مش عادي وسي عاشور الاسكندراني حارس النجمه زمان د.ابراهيم التاجوري اول خريج طب موفد لالمانيا والحاج احمد لوجلي اللي كان حوشه مخزن للملابس ايدزوا فيهن للجزائر ولاننسي احميده فاصوليا .. واجدين يارايس لكن الذاكره معش كيف قبل
- محمد البرعصى منور يا سيحساوى ...... سيدى حسين خاصة وبنغازى عامه عامره بالرجال ............ سامحنا ياخلود مازالن 3 أسئله بس وما نبوش انردو حد ........... سؤال من دنيا ..س - هل يؤمن بالعلاقة والحب قبل الزواج؟
- خالد الرقيعي خوذوا راحتكم
الحب الصادق والبرئ والمبني عالحب نفسه اكيد نؤمن بيه
والعلاقه لما اتكون صادقه ومبنيه عالحب والتفاهم وتكوين بيت وانجاب اطفال
وتربيتهم كويس اؤمن بهذه العلاقه واؤيدها اكيد .. - محمد البرعصى سؤال من اقدروه ( اقدوره داير ارجاع ملفات ) ههههههه عارف كل شى
س _ مكن تحكى لنا على تجربتك فى كلية الاسنان ؟ - خالد الرقيعيتجربه كويسه قعدت مسجل لكليةالاسنان لمدة ثلاث سنوات
كليه اول ماجيت إلقيت ادارة المسجل خايضه ومافيهش تنظيم بكل
بديت انظم فيها والصراحه كانوا معايا شباب الله يذكرهم بالخير ساعدوني واجد
كنا نقعدوا لعند س 12في الليل .. ودرت منظومه لاول مره في ال...كليات الطبيه بس في نفس الوقت متعبه لانك تشتغل في مجتمع يحساب الكليه كيف المدرسه الثانويه واحد جايب باته واحد جايب امه وحشايم وصلت لعند ايجوني ناس مانعرفهمش لعندالحوش وايقولولي نجحلنا ولدنا .. لكن بصدق توا هي احسن كليه تنظيميا في كليات قاريونس كلها وهذي بشهادة عميد الجامعه السابق د.عبدالهادي موسي - محمد البرعصى منور يا خلود وهذا مش غريب على شاب مثقف زيك ... وياريت يعطو الفرصه للشباب كلهم ...............
هذا سؤال أخير : افضل اغنية فى الغيطة عندك ؟؟ سؤال فيه جو نختمو بيه .. من فارس المهدوى - خالد الرقيعي ههههههههههه حلوه يافارس .. اغنية السحساويه ...
سيدي حسين دلال الغيطه يفزع وين اتصير العيطه - محمد البرعصى ههههههههههههههههه وبالغيطه نودع ضيفنا حلقة اليوم الى طولنا عليه وان شاء الله ماكنتش محاور ثقيل الضل عليه ..... ونشكر كل الشباب الى حضرو وتابعو حلقة اليوم من ضيف المربوعه ................ لنا لقاء مع ضيف جديد بعد شهر رمضان المبارك وكل عام وانتم بخير ....... مفتوحه ياشباب
- محمد الرايسكل الظلام الذي في الدنيا لا يستطيع أن يخفي ضوء شمعة مضيئة
...وكل الشموع التي في الدنيا لا يستطيع ضوئها أن يحجب بريق الصداقه
كل الشكر والاحترام والتقدير للمتالّق والمحاور المبدع د محمد البرعصي والخفّاش الذي يبذل الجهد والعبقريه خلف الكواليس خالد الترهوني وللضيف الذي في الواقع هو من اصحاب الدار الكريمه واحد ابرز رموزها والذي لم يبخل علينا باجاباته الصادقه والدافئه النابعه من القلب الصافي والى الكابّو زياد صاحب هذه الدار الكريمه الذي جمع شتات هذه العائله في قروب من اجمل وامتع ما يكون والى كل الاعضاء المحترمين من شارك منهم ومن لم يحضر تمتّعنا بحوار شيّق يبرز بعض الامور التي تقرّب كل منّا للاخر في جو ودّي ويكاد ان يكون عائلي وهذا ارقى واسمى انواع الصداقه تمنياتي للجميع بالسعاده والهناء في حياتكم العائليه والعمليّهSee More - خالد الرقيعي لابلعكس يااحميده انت محاور ممتاز وخفيف الدم ربي يحفظك
شكرا لك ولكل الشباب والشابات اللي غايبات اليوم انا كنت سعيد بيكم وبأسئلتكم الهادفه وان شاءالله ديما ملتمين عالخير وكل سنه وانتوا طيبين - Zyad M Al Kadiki والله اسف عالتاخير يا خالد و فاتني نص عمري الليلة لكن الشباب ماقصروش ان شاء الله
- Haitham Al Shereef قصدك الخميس الجاي مافيش زر خسارة هههه....امنور يا خالد وان شاء الله تلقا العروس قريب واتجيب العكشي وايغنيلك سيدي حسين دلال الغيطه يفزع وين اتصير العيطه
- محمد البرعصى منور ياخلود .... وطبعا الجندى المجهول الخفاش رقد ... وانقولوه بارك الله فيك على مجهوداتك ........ ومنور يارايس على كلامك الحلو ..........
- Mani Ali بارك الله فيك يااخلوده ومنور على الرد الجميل وانتمنولك التوفيق ..انتم ياشباب محمد وخالد امنورين وصحيتو وخالد امنور اسف على السكنان لكن خلاص عند المفتاح هههه
- محمد البرعصى منور يامانى ............
- خالد الرقيعيشكرا يارايس علي كلامك الراقي والحلو والمعبر عن اللي في صدرك ايها الصديق الطيب .. زيوده ولاايهمك .. هيثم منور ياخويا علي شعورك والعكشي عليك في الفرح ... ماني شكرا لك وانت صديقي مها ايصير
وشكر كبر ليبيا كلها لخفاش الليل طعمة القروب ربي يحفظك ...ان شاءالله
كل سنه وانتوا طيبين ورمضان مبارك عليكم
تصبحوا علي خير - عبدالقادر العرابي السلام عليكم يا خوتي ::: نبي نطرح سؤال لخوي خالد بعد اذنكم ليش ما نستفيدوش من بقية اعضاء القروب مثل احمد عقيلة واحمد نا صر قرين وغيرهم ممن اثروا ساحة الموروث الشعبي بالعديد العديد من الاعمال ؟
- Ahmad Elhouny منور ياخلوده وسامحني لاني ماتعرفتش عليك من الاول (سامن في الصوره )كنا نعرفوا بعضنا ايام بيت واحد ايام حلوه رغم المناوشات مع احمد الله ايمسيه بالخير
ليست هناك تعليقات:
إرسال تعليق