- محمد البرعصى مرحبا زياد
- Zyad M Al Kadiki مرحبتين بيكم كلكم
- محمد البرعصى بدون مقدمات .....نبو نتعرفو على شخصية زياد ..... من ايكون زياد الكاديكى
- Zyad M Al Kadiki زياد مصطفى الكاديكي .. 1971 .. متزوج .. 3 اولاد و بنت .. شهادة ثانوية .. اعمال حرة سابقاً .. وحاليا موظف في شركة توكيلات ملاحية تحت الانشاء
- محمد البرعصى باهى ماشاء الله ...ربى ايوفقك ..... نبو نبذه عن تأسيس القروب ؟؟
- Zyad M Al Kadiki بصراحة الفكرة جاءت عن طريق مفتاح حسن الشين .. ابن عمي .. كان كل مايشوفني يقوللي مصطلح قديم و كنت نحس بالايام الجميلة اللي عشناها في صغرنا فقلت ليش لا الواحد يحاول يدير جروب للمصطلحات و مكنتش نتصور ان حيكون هكي .. لكن الحق كله بجهود الشباب اللي موجودين حاليا بدون استثناء
- محمد البرعصى تقدر اتقولنا يوم تأسيس القروب او على الأقل الشهر والسنه؟؟
- Zyad M Al Kadiki والله صعبة شوية .. لكن في حدود السنة مش اكثر .. بس ممكن لو حد يوسع باله و يحفر للبداية ممكن ايجيب عيد ميلاد الجروب
- محمد البرعصى باهى تمام بس ياريت اتشوفلنه على الأقل الشهر والسنه ...بس انهنيك عل الفكره ..... شنو اهتمامات وهوايات زياد الكاديكى ؟؟؟؟
- Zyad M Al Kadiki بالنسبة للهوايات .. الانترنت و الكمبيوتر و لعب كرة القدم .. الاهتمامات كل مايخص تطوير العمل اللي انقوم بيه
- محمد البرعصى خلاص معناها نسقنا فى مباراة وراك تنسى الرايس ....
- محمد البرعصى سؤال من عبد القادر الغزال . (اقدوره ياطير امنور )
ماذا يعنى لك الحاج مصطفى الكاديكى رحمة الله عليه؟؟ - Zyad M Al Kadiki تم .. اقدورة الحارس امتاعي
- محمد البرعصى هههههههههههههههههههههه
- Zyad M Al Kadiki الله يرحمة و يسامحة و ان شاء الله انحج و انحجلة
- محمد البرعصى الله يرحمه وايسامحه ......... اللهم أجعل مثواه الجنه امين
- Zyad M Al Kadiki كل حاجة في حياتي كانت تحت ظلة و فقدته كانت كسرت ظهر للعائلة كلها مش انا بس .. لكن الحمد الله للان صيته قدامنا و عايشين بحسه و ربي يعلم ان فقدناه
- Zyad M Al Kadiki اسمها جود .. وهي دنيتي كلها
- محمد البرعصى اتربى فى عزك ..... وان شاء الله اتشوفها عروس وتفرح بيها
- Zyad M Al Kadiki ان شاء الله .. مرة خطبها هيثم ولد خالي لكن مبيناش نعطوها له
- محمد البرعصى سؤال من الرايس ( بركة القروب خير يابركه منور والله)
ماهي العوائق الني واجهتك عند تاسيس القروب؟ - Zyad M Al Kadiki الحمد الله .. لكن العوائق صارن بعدين و كلنا نعرفوهن .. مرات يجيك حد متعرفش و يحاول يخرب عالشباب و الشبابات .. لكن بتماسكهم مع بعضهم و بجهود جناب السفير ان شاء الله الامور تمام
- محمد البرعصى سؤال ثانى من الرايس( ديمه امتحانه طويل الأسئله واجده ههههه)
هل انت راضي عن سير القروب وهل كان مثل ما توقعت ام هنالك بعض الملاحضات ؟؟؟ - Zyad M Al Kadiki منكذبش عليك .. صحيح انا المنشئ لكن الادارة كلها شور الاستاذ خالد الترهوني و جت فترة انا سيبت الجروب لكن الصراحة خالد الوحيد اللي كان ديما متواجد وهو اللي مسئول على سير المجموعه و هو اللي نقدرو نسالوه السؤال هضه
- Zyad M Al Kadiki بس نقدرو انقولو ان اللي يخش صعب يطلع منه
- محمد البرعصى تم تو نسألوه بعدين .............
- Zyad M Al Kadiki الصداقة هي الحياة
- Zyad M Al Kadiki عادل مديري في الشركة ردو بالكم منه
- محمد البرعصى سؤال من اسماء شلوف ( لبنان شنو الجو )
لو كملت تعليمك .. شن التخصص اللي تختاره او المهنة اللي كنت تتمناها؟ - Zyad M Al Kadiki كنت انتمنى اني نكون كابتن طيارة .. لكن الحمد الله اللي ماصارش هكي و قعدت مزارع لفترة من الزمن لاني تعرفت عالانسانة اللي حبيتها و تزوجتها ... كانت موظفة في المصرف الزراعي و عاشت معايا عالحلوة و المرة
- محمد البرعصى ربيى ايخليكم لبعضكم ...... والحياه اقسام ...كل واحد مكتوبله نصيبه من الحياه قبل ما اتجيبه امه
- Zyad M Al Kadiki اقسام شن الجو
- Zyad M Al Kadiki هضه خليه يكلمني خير
- Zyad M Al Kadiki بس انجاوبه
- Zyad M Al Kadiki الاسرة هي الاساس .. تكونها صح .. تعيش صح .. زوجتي هي اللي شايلة كل حاجة .. العيال و بات العيال و الحوش و منبيش نحكي اكثر من هكي طييييييييييييييط
- محمد البرعصى هههههههههههههههههههههه سؤال وجيه صار ............ نقرى فى الشخصيات ومانندريش على روحى ........... عصبى شنو الجو ههههههههههه
- Zyad M Al Kadiki اول مرة كانت قديمة بكل عن طريق صديق اسمه صالح المرغني في ال 97 تقريبا .. هذي اول مرة انشوف الانترنت و كان عالق الخط دولي و كان ضعيف جدا و بعدين كان في انترنت في شارع دبي بس مش عارف شن اسمه كانت الدقيقة ب3 دينار وقتها و بعدها اللي تعمقت فيه عن طريق صديقي مصطفى النخاط و منه تعلمت منه اغلب الاشياء عن الانترنت
- محمد البرعصى الدقيقة ب 3 دينار ......... صار ال 10 ب 30 جنيه ........ عولمه ...يلا سبحان مغير الأحوال
- محمد البرعصى سؤال من فدا ... عضوه جديده ورحبو بيها كويس
مافيش مره فكر يسافر يشتغل برا اول جاته فرصه هكي؟؟؟ - Zyad M Al Kadiki زمان جتني فرصة نشتغل في محل انترنت في مصر و من بعدها نقرا في الخارج طيران لكن بصراحة ترددت و السبب طيييييييييييييييط
- محمد البرعصى وين ثانى طيييييييييييييط انعدولك ...ههههههههههههههههههه
- Zyad M Al Kadiki توة كيف انجاوب و هي جنبي
- محمد البرعصى طيييييييييييييييييييييط الثالثه .......... قول يالله يالله وهدرز
- Zyad M Al Kadiki لو زوجتي قصرت في حقي انا متاكد ان هي حتخطبلي بروحها
- محمد البرعصى تمام بكل .......... اجابه منطقيه ..
- محمد البرعصى سؤال بريكه ( ق القروب ) وامسك ما جاك رسمي ........
السؤال للكابو لو جت بنت بعد ما تكبر وقالتلك يا بابا انا تعرفت على واحد وعندي به علاقه شنو يكون موقفك منها ومنه - محمد البرعصى مش شورى ............
- Zyad M Al Kadiki ان شاء الله خير .. سؤال في علم الغيب .. وصعب .. منسبقوش الاحداث
- محمد البرعصى سؤال من العضو : أحمد الهونى ( عضو جديد ومميز وأخلاقه عاليه )
شن شعورك و القرب قريب يوصل ل 1500
- Zyad M Al Kadiki الحمد الله و كله بفضل الله و الشباب وانتمنى ان الاخ احمد تكون مشاركاته اكثر من هكي و يكمل الحروف الابجدية
- محمد البرعصى ههههههههههههههههههههههه وين طق هوا توا .معش كملت انا وقفت فى ال ج
- محمد البرعصى سؤال من تالا ( كيف حالك يا ابله وردى بالك من اعيال المدرسه الله الله فيهم)شن يعنيلك قروب المصطلحات وافراده؟
- Zyad M Al Kadiki القروب .. يوم حلو و يوم مر.. وافرادة عرفت منهم ناس مستحيل انتعرف عليهم في اي مكان اخر وان شاء الله ربي يدوم المحبة و الاحترام ..
- محمد البرعصى امين ...........
- محمد البرعصى سؤال من عادل الكوافي ............ صحيبك ( بعد خطرها كيف حال العمده ) ماذا تعني لك المزرعة ؟
- Zyad M Al Kadiki المزرعة .. ذكريات الشباب و الاصدقاء و فيها عرفت من هم اصحابي و من هم اصحاب على ورق
- محمد البرعصى سؤال من اسماء شلوف ) وين عرب لبنان واعيين ماشاء الله كرمال اعيون زياد )شن في اعتقادك احسن ميزة و اسوأ حاجة في شخصيتك؟؟
- Zyad M Al Kadiki نبدا بالاسوأ .. في صديق مسميني بطل ردات الفعل السريعة ..و انا كذلك ردة فعلي سريعة و ياريت محدش يحكم عليه في وقت المشكلة لاني مرات انقول كلام انا مش قاصدة و بالنسبة للاحسن .. تقدرو تنشدو عليها حد اخرى
- محمد البرعصى وين دبلوماسى يامدير .......... ومراوغ ... ماشاء الله عليك
- محمد البرعصى سؤال من زهيرا .. افراح شن الجو
شنو الاكلة الي يحبها زياد ؟ تحياتي.........( راك اتقول المسمنه هههههههههه) - Zyad M Al Kadiki معليش الخط فصل
- Zyad M Al Kadiki مع اني زاعل منها لكن حنرد
- Zyad M Al Kadiki علي بن ابي طالب .. السدرة .. راس لانوف .. علي بن ابي طالب هذين كلهن قريت فيهن من اولى لغاية سادسة
- محمد البرعصى سؤال من مهدي ويعتذر عن التأخير ( ادفع خميس قرش تأخير جو تاجير بشكيليطات) هههههههههههههه حناطه زايده....
كم يعطي للقروب درجه من 10؟؟
وهل هو راضي عن نفسه فيما حققه في حياته العمليه؟؟ - Zyad M Al Kadiki واعر السؤال هضه يا اقدورة و كان جاوبت من اليوم لغاية بكرة منوفيش الراجل حقة و ارجوك اعفيني
- محمد البرعصى سؤال من عادل الكوافي..... (الجماعه ما صدقو حصلو فيك فرصه ههههههه)
ما الفرق بين زياد العازب والمتزوج ؟ - Zyad M Al Kadiki اطرف موقف كان في واحد صديقي جيرانه توامه و انا منعرفش انه في اتنين نين همه اكتشفوها صدفة و خلوني نين جيت لحوش صديقي و طفو المفتاح الرئيسي و بعد جاء الضي القيت قدامي اثنين
- محمد البرعصى سؤال من العضو زيزى ( ماليزيا شنو الجو ) ما قدرنش انردوها ..اسمحلنا ..
لو قالولك تقدر اتسافر لأي بلاد زياره...وين تمشي؟ - Zyad M Al Kadiki والدي زمان دار رحلة لشرق اسيا و هو لف اوروبا كلها .. لكن قعد شهر يحكيلنا علي ماليزيا
- محمد البرعصى سؤال من اسامه الجلي ....... ( كولاورادو شحالكم طيبين )
لو زياد عطوه فرصة لتغيير شئ واحد في بنغازي ماذا سيكون هذا الشيء؟ - محمد البرعصى فى النهايه ما يسعنا الا ان نشكرك على رحابتك صدرك واستقبالك لنا فى مربوعتك ... وان شاء الله ما انكونش كنت محاور ثقيل عليك ...والاسئله كانن مركزه اليوم ..... لكن انقولك شكراا وشكراا لكل من سهر امعانا الليله وطبعا ما ننسوش الحوراء المحاوره الغايبه وانتمنو كل الخير لشباب القروب وشباب ليبيا والعالم الاسلامى عامه ( وطبعا اللقب الكابو من انغير من انقولها ) شكرا مفتوحه يا شباب
- Khaled Eltarhuni بارك الله فيكم عالمقابله الحلوه .. بس في مشاركه متأخره من الرقيعي
ماذا يعني لك الحاج مفتاح الشين الله يرحمه وابنه حسن وبناته ؟ - Zyad M Al Kadiki الحاج مفتاح كان له فضل كبير علي والدي مع ان كان زوج جتي لكن والدي عمرة ماحسسنا انه غير جدنا و حسن هو عمي الوحيد ربي ايطول في عمرة و تعلمت منه الحن و صلة الرحم و حسن المعاملة و عماتي ماشاء الله سبعة و كل وحدة لها معزة خاصة وكل وحدة مدرسة في حاجة معينة
- تالا محمد بارك الله فيك أستاذ زياد وان شاء الله ياربي أنشوفوك حاج مروح من بيت الله9 حجات وربي يخليلك اسرتك الكريمه وياربي أتشوف اولاد أولاد أولاد أولادك ... وشكرا للدكتور المحاور المتألق وربي يحفظكم ان شاء الله
- Zizi Rustomakis بارك الله فيك و شكرا استاذ زياد و تشرفنه بمعرفتك...والله يا ريته ديما اديروها متاخره هكي عشان انطق فيها :)))))
- Zyad M Al Kadiki شكرا لكم كلكم و اخص بالشكر الدكتور محمد البرعصي صاحب الفكرة و مقدم الحلقة و راهو عنده افكار جديدة قريبا في رمضان
- محمد الرايس شكرا يا دكتور على سلاسة اداءك للحوار وبروح مرحه وشكرا للكابّو زياد على اجاباته المنطقيّه والصادقه والشكر لجميع الاعضاء الحاضرين والغائبين وفعلا استمتعنا بلقاء جميل في سهره حلوه وطيبه دامت الصداقه عنوانا للمحبّه والوفاء
- محمد البرعصى منور يابركه والله ............ مبدع شنو رايك اتوقع امعانا عقد فى البرنامج ...( شيك مفتوح هههههههههههه ) تستاهل اكثر من هكى
- محمد البرعصى ان شاء الله انكونو ما زعلنا حد فى ها الليله ... بصراحه اسئله كثيره والوقت ضيق ....... وما ننسوش المبدع دائما وابدا خلف الكواليس الخفاش ( خالد الترهونى)
- Osama Elgelly السلام عليكم و رحمة الله و بركاته منورين يا شباب و يا شابات عالتعليق و الاسئلة التي كانت في قمة الرقي و بارك الله الله فيك يا اخ زياد علي الاجابات الممتعة و المفيدة
و صحيت يا احميدة عالفكرة و التقديم المتألق كالعادة - Mani Ali امنور يازياد ...ويامحمد وياخالد امنورين وصحيتو الحلقة اليوم مع صاحب الدار كانت ماشاء الله عليها وان شاء الله ديما ملتمين على الخير
الخميس، 29 يوليو 2010
الحلقة الرابعة من برنامج ضيف المربوعة مع صاحب المربوعه وحده ....الكابو زياد الكاديكى
الاشتراك في:
تعليقات الرسالة (Atom)
ليست هناك تعليقات:
إرسال تعليق